ستي وانا ..محكي للشاعر السوري موسى معروف

 ((((((((( ستِّي...و...أنا )))))))

-- يا ستّي يا ختيارة.....يا زينة هاك الحارة

ياما قعدتي عَ هالدرب....وغنيّتي عَ الهوّارة

-- كنتي ب عمر الشباب..ويلْتفّوا حوْلِك.لحباب

ولمْجَوّز قبل العذّاب. ....يطلب ودِّك يا سارة

-- يا ستي يا ست بدور..وجهِك متل القمر يدور

ولمّا تكوني عَ التنّور .. ترقِّي خبزِك عَ الطارة

--وعَ الحصيدة وبالمنجل... كنتي دوماً عَ الأوّل

بالصوف دَوَخْتي المغزِل....ومَحلا رسم السنّارة

--عَ النبعة كانت أخبار..وياما حملتي عليها جرار

ختيرتي وصار اللي صار.....والنبعة تاهت أسرارا

-- لمّا ضهرِك حَنى ومال...من كتر ما شال احمال

مسافات الدرب. ميال...... بتكسر ضهر البدّارة

-- ياستي لمّا ختيرتي.....ليش تركتيني ورحتي

شباب الضيعة سوسحتي....وذكرِك متل الفنارة

-- بيقولوا الزمن قلاّب.... وبيبرم متل الدولاب

ياما كان عندا أحباب ....لاتزيدوا عليها حجارة

-- وكان جدّي متل الباز....وبالحب بياخد ممتاز

ولمّا صرتي عَ العكّاز.....راح يبصبص عَ الجارة

--ياستي زمانك. راح.. ومن قفلك ضاع المفتاح

ضهرك متل قوس رماح.....ونجماتك فَلّتْ أقمارا

-- ياستي ياست الكل......ياللي ذكرِك رح بيضَل

وعطرِك من زنبق وفل..وخصرِك متل الأسوارة

...........

--يا تيتي لسّاك زغير....لا تلبس صباط الغير

بتمضّي عمرك تعتير.....وما في بالجيبة بارة

-- ياتيتي دربك من هون

.........................انشا الله الصعب عليك يهون

خَبِّي حَطبَاتك لَ كانون

................................ ولا تمَضّي العمر خسارة

..........................

...موسى معروف..

.....٢٠٢٠/٤/٢٥....