متل الغريب.محكي للشاعر السوري ناصر صالح
قصيدة بعنوان
( متل الغريب)
عايش حياتي بها لدني شبه الوحيد
عايش لحالي و مبتعد عن هالبشر
و ما في حدا لما احتجتو مد إيد
غابوا النجوم و ضل وحدو هالقمر
الله عطاني الصبر و الطبع العنيد
ونفسي عزيزة ان جاعت بتاكل حجر
فيي الوفا مزروع جوات الوريد
فيي قلب ما خان عمرو و لا غدر
و عني ما بعرف ليش يا حظي بعيد
بيني و بينك في مسافة و في سفر
عندي قلب حساس و من نوعو فريد
بيأمن بألله و بالقضاء و بالقدر
عايش لحالي متل شي تايه شريد
متل اليتيم و لحضن إمو افتقر
عايش متل إنسان ما بشوفو سعيد
من كثر حزنو هالدني كلا احتقر
عايش متل مرضان أوجاعوا تزيد
و جنبو التهب من كثر ما انغز بأبر
عايش متل شي طير من خوفو طريد
و ما عاد قادر يحتمي بغصن الشجر
و خلفو جرى الصياد تا روحو يبيد
و يعمل عا لحمو هالطري حفلة سكر
عايش متل مسجون مكبل بالحديد
و لولا مخافة ربنا كان انتحر
حزني كا حزن الأم عا إبنا الشهيد
حزني حزن يعقوب لسنين استمر
و ببكي عا حالي بكوة الطفل الوليد
و بقول هيكي ربنا عليي أمر
---------------------------------
ناصر صالح
تعليقات
إرسال تعليق