فستانك النيله..شروقيه للشاعر اللبناني طوني الحكيم

// زجل الإثنين //

شروقيّة

( فستانك النيله )

١.

تحت العريشة كنت قضّي ليالي ملاح

وسوّي بإيدي إلِكْ، تنباك أرغيله

وعلّل القهوة معِك عا بُنّك الفوّاح

ويطيب ليل السهر من كل تعليله

٢.

ونقعد عا فرشة عشب،نتساير ونرتاح

ومع كل همسة غزل،بَوْسه تودّيلي

وتحرقصيني برفّة،رمشِك الجرّاح

كلما يهبّ الهوا،وبخصرك تميلي

٣.

ونروح بعد السهر،عالمعصرة سوّاح

وإسمَع تقولي إلي،من الروح ترتيله

وأشعر بأنّو الدني،تزكة خمر وقداح

وغمره وجمره ولعب ،مع بنت منجيلي

٤.

تذكّرت آدم عندما،طيف حوّا لاح

قدّام عينو، وولع من أوّل فتيله

لمّا بسرعة أكل،من إيدها التفاح

قلّو يا ألله بعد،عالأرض ودّيلي

٥.

من دون حوّا الدني،ما بتحتوي أفراح

وقنديل عمرِك ما ضوّى،وشعّ قنديلي

ما الحب إلّا سجن،بابو بلا مفتاح

وزنّار أبيض ربط فستانك النيله.؟

/ / /

(( الشاعر..طوني الحكيم..))

// ٦ // ٧ // ٢٠٢٦ //

صالون لينا الأدبي للأدب والشعر في بلد الفكر