بدون كذب .. محكي للشاعر السوري أحمد دلول

 بدون كذب

يلعن بيك حريه وعرض التعتير

وعرض العارف ببلادي شو عم يصير

ارقصنا افرحنا ودبكنا وارفعنا الراس

وكل العالم حسدتنا صغيرا وكبير

خجلان وماني عارف شو بدي قول

كل واحد ضد الثوره سموه فلول

واللي مابيعرف يحكي صفا مسؤول

وعنزه جربانه وحده مافيه يدير

من تحت الدلف اصبحنا تحت المزراب

وقبل المغرب ب ساعه نغلق لبواب

خايف جاري يسرقني واحد نصاب

نسينا النوم بضيعتنا وصرنا نواطير

ماعاد بدي حريه صار بدي رق

البحصه علقاني بحلقي ومابقدر بق

الكوع كذاب واسمو اصبح منشق

صار عيونا للسلطه ويكتب تقرير

خبز وكهرب كسرونا مع جرة غاز

وصفا الطابخ محموسه عامل اعجاز

يرحم ايام الجله وببور الكاز

تمضي ليلك ع العتمه ودفع فواتير

قالوا الحريه نعمه ابشرنا بالخير

والحريه ببلادي قتل وتدمير

بسمع كل ساعه وساعه صون زمامير

واحد مات من الجوع الثاني تفجير

قالوا اتهدوا ايام الحاله بتروق

ولوح الطاقه الشمسيه صفا مسروق

بحكم الاعدام قبلنا جانا الخازوق 

شو الايام مخبايه ياربي تجير

عمله جديده صكينا وشلنا الاصفار

بتعطيني ليره سوري وبدك دولار

اوعى تلعب بيكفي تحرقنا بنار

حاجي تقدم اعذار وتعمل تبرير