كره الحبايب .. قصيدة بالشعر المحكي للشاعرة فهيمة يوسف. من سورية

.................كره الحبايب .................

...................................................

من كتر ما بحبو ونسيني بكرهو

.............وع قـدّ مـا كرهتو سنيني تالّهو 

يا قلب مـالك كـل مـا تقلّي نسيت 

..........بيعود صمتك متل صمتي بيندهو 

تعوّدت يا قلبي على الصّبرالمرير 

.........والصّبر رغم الشّوك  بتحسّو حرير

يـامـا بشر بيـفـيّـقـا شوك السّريـر 

.....ولحظة دفى تحت الشّراشف يشتهوا

وبيقدّموا أعظم  مواعظ بـالحكـي 

............وبيحلّلـوا قـتـل المشـاعر بـالبكي 

وبـالسّر كـلّـو من ظروفو يشتكي 

...........وعن حبّ عـاشوا بجنتو يتنزّهوا 

منحب نحكي الصّح ونخاف الملام 

...........والعين تنقل بالصّدق أجمل كلام 

منحـب أسم الحـب ونـقـلّـو حــرام 

......ليش الكذب وانتوا الحقيقة بتفقهوا؟

ليش الكذب وانتوا الحقيقة بتعرفوا 

.......قولوا الصّدق مرّة ومشاعرنا انصفوا 

لاتفكّروا بـالزّاد وحـدو بتـكـتـفـوا 

..........كافي وحرام الحب أسمو تشوّهوا 

خلّوا القلوب تحب وتعيش الهنا 

............بلكي الليالي الحالكة تضحك لنـا 

لاتعتبوا عالقلب وتلوموا المنى 

..........لولا الأماني شموع عمري بينتهوا 

بالحب يحلا العيش ويطيب السمر 

..........وتموت أهل الحقد ويغيب الضّجر 

قضّيت عمري غازل وناجي القمر 

.........لاطلّ صوبي ولا سمعت  مرّة  نداه

.....تـاري القمر وحـدو بـبـعدو بيشبهو ....

......................................................