لا انت خيي ولا أنا خيتك. محكية للشاعر السوري محمد قاسم أبو ثائر

 لا أنت خيي ولا أناخيتك:

خبيت عنك كل احلامي

ومر العمر عا طول قدامي

حتى كبر بالعرض هندامي

ومانسيت اني بيوم حبيتك

------------

بتذكر عاتوتة الجيران شو حكينا

وتفرفطوا الحبات بايدينا

صار الصبح نمنا ومادرينا

لا رحت عبيتي ولا انت عبيتَك

-------

عملنا جدايل من ورق وغصون

حتى جمعنا شوي من طيون

قلتلك انصعبت بعد بتهون

وجوات نبض القلب خبيتَك

-----

ولك آه ما احلى زمن وزمان

كان الزمن مفروش للانسان

نقطف عنب ونجاص مع رمان

يبيعوا بغلا ومن يومها شريتَك

--------

ياريت فينا نرجع اللي فات

وانت وانا نرجع لها الفيات

نحكي ونتغامز بها الكلمات

انت بهدا ربيتني وبشويش ربيتَك 

------

تخمين كلشي راح وتخبا

متل اللي خبٌت عمرها بعبا

ايامنا الراحت أوعاك لا تسبا

لا انت نسيتها ولا أنا نسيتك

--------

قالوا العتابا للهوى صارت

وحتى الربابه بعدنااحتارت

وغنواشروقي والصبا غارت

لا انت خيي ولا أناخيتك

محمد قاسم ابو ثائر 9/1/2021