درب الحجاج. محكية للشاعر السوري سليمان أبو لطفي وسوف
. درب الحجاج
شعرك سواح ومواج
بيلبقلك عاراسك تاج
بحياتك صدرك ضبيه
من صدرك بيغار العاج
حلوي وكبيره بعقلك
تاج ملوكي بيلبقلك
لو غبتي رح بشتقلك
بحياتك لا تزيدي غناج
غناج علي لاتزيدي
بعمل شو ما بتريدي
والله لو يطلع بيدي
لفرش دربك بالديباج
عجناب الدرب الميسور
رح بزرعلك احلى زهور
عابيتك بعمل ناطور
مابيلزم سور ولا سياج
حجوا الحجاج وعادوا
وكل واحد نال مرادو
الشافك حجو مافادو
ليعيد الحجه بيحتاج
عيونك سود بينحبو
بيلهوا المؤمن عن ربو
زيحي عيونك عن دربو
بعيونك بحر وامواج
خلي الصايم بصيامو
يعد يكمل ايامو
لو بتمري قدامو
لصيامو بيقلو حاج
يادلو الجنبك بيمر
حسنك فتان وبيغر
مخبايي بعيونك سر
زيحي عن درب الحجاج
من الارشيف
سليمان أبو لطفي وسوف
تعليقات
إرسال تعليق