ولك حل عني. محكي للشاعر السوري سليمان أبو لطفي وسوف
احد مبارك على الجميع
ولك حل عني
ولك حل عني زهقت مابدي
لا قاربك لا شوفك بحدي
دور وشفلك شي بنت ترضيك
معها العمر عمرين بتقضي
ولك حل عني
ولك روح دور يمكن تلاقي
وحدي عشكلك ضاقت خلاقي
انسى المضى سكر على الباقي
بيناتنا ماظل في مودي
ولك حل عني
تحملتك ومرقوا عليي سنين
تحكي بجفاصه جاوبك باللين
مغرور انت كتير يامسكين
الماضي مضى مراسيل لاتودي
ولك حل عني
شو كنت حبك وندمت ياحيف
تشرين طل وراح فصل الصيف
مانك لضرب السيف ولا للضيف
وعودك حكي وعلاك المصدي
ولك حل عني
كشفتك قليل الوفا والناموس
من عشرتك مليت خدت دروس
لا تمر جنب البيت يامنحوس
ان مريت بسرعه مر لاتهدي
ولك حل عني
قطعت العهد ماعاد فكر فيك
ورفيق دربي روح مابرضيك
حاجي تلف تدور مابيكفيك
مافيك خير بساعة الشدي
ولك حل عني
انغشيت فيك بوقت ماشفتك
ممثل قوي التمثيل ماعرفتك
لكن ياحسرة بعد ماكشفتك
دربك طلع ع النار بيودي
ولك حل عني فهام شو ردي
٢٠٢١/١٢/١٢
سليمان ابو لطفي وسوف
تعليقات
إرسال تعليق