نيسان .. محكي للشاعر السوري سليمان أبو لطفي وسوف
. نيسان
فل البرد والرعد يانيسان
لما رجعت وببسمتك طليت
جبت الدفا للجانح البردان
ولون اخضر للغصون عطيت
والحقل عنا ازدان بالالوان
بربوعنا بهجه وفرح خليت
بالهمس قال اللوز للرمان
تبقى الدني نيسان اه ياريت
نقيق الضفادع سهر الغدران
جبت القمر من غربتو رديت
شلعات معزي سارحه بوديان
لمنجيرة الراعي حياة عطيت
بنغماتها بتروي سمع عطشان
بتشدو البلابل معي لو غنيت
شاعر انا سارح مع الرعيان
لطلتك نيسان شو حنيت
لعهد المضى يامهيج الأشجان
يرجع ربيع العمر شو تمنيت
يعود الزمن ويجمع الخلان
اسهر مع الحلوات شو حبيت
بتذكر العمر المضى ويأسان
وحكايتي حكاية ابريق الزيت
صرت بخريف الالم والاحزان
بقلبي ماعاد الحب يبني بيت
هيك العمر بيمر ياانسان
من وين رح بتعود لو فليت
مأكد مصيرك عالم النسيان
لو مال قارون جمعت وحويت
ارشيف
سليمان ابو لطفي وسوف
تعليقات
إرسال تعليق