باقة عتابا .. للشاعر السوري محمود علي علي
باقة عتابا
"""
حيالله الغوالي
ياغيدا في رباكَ دللينا
ورجوتك عديارك دلي لينا
استوى عنقود كرمك دلي لينا
لنرشف من لما كرم العنب
ياغيدا في ديارك عللينا
وغيابك كان فينا علّي لينا
درنا الصين نبحث عاللي لينا
وفتلنا الهند ماردوا جواب
ياغيدا من رضابك ارشفينا
وبـذاكـرة الـدفـاتـر ارشفينـا
وبخمر دنان حبك ارشي فينا
وحيينا تحيات الطياب
ياغيدا باللطافي عاملينا
روابيكي محجّي عاملينا
صرلنا زمان عطشى عام لينا
مادقنا من لماكي هالرضاب
اجمعينا في رباكي وقربينا
لحقنا حر قاسي وقر بينا
وكلمن قر فيكي وقر بينا
ياغيدتنا ترى نال الطلب
ياعلوى بالمعالي علّي بينا
احفظينا من الخطايا علّبينا
وإذا شي يوم وقعت علّي بينا
امسحيها بكفّ تيروح العطب
على جمر بلظاكي قلّبينا
نحنا كتار مافي قلّ بينا
ياقلبي للخلايق قل لُبَينا
جرحني رمش عينا والهداب
بمنخل خشن غيدا غربلينا
ونحنا بإيد واحد غر بُلينا
شروق الشمس صاير غرب لينا
وغروبا شرق بعيون الطياب
بشباكك ياغويدا شربكينا
ومن ينكر هواكي شرب كينا
إذا شي يو جانا شر بكينا
تحتى يزول عنّا هالمصاب
بقلمي ـ محمود علي علي
تعليقات
إرسال تعليق