شهر أيار ... محكي للشاعر السوري سليمان أبو لطفي وسوف
احد مبارك عليكم
شهر ايار
بوعى الصبح بكير بالعادي
بسرح مابين التل والوادي
بعشق رواق الجو بأيار
ورقه وقلم زادي وزوادي
بشوف عحفاف الدرب ازهار
فواح عطرا النحل بينادي
سنابل قمح بيجمعوها غمار
صبايا ع درب العين ورادي
وفيروز عم تنده على جلنار
تقلا تعي نسم هوا بلادي
ضاع شادي قولكم وين صار
مشي معي ندور على شادي
والجو صاير ملعب الاطيار
والحقل فيه كتير صيادي
راح البرد ومواسم الأمطار
رف السنونو بالسما بادي
شدو البلابل يانغم قيثار
فوق الغصن عم يلعبوا دادي
ونغمات راعي دوخ المزمار
يابو الزلف هيهات ع اليادي
ومحاورة شبين مع ختيار
شوية زجل وشوي قرادي
منظر جميل بيبهر الانظار
عند المسا بيروق بزيادي
اجمل شهور السنة يانوار
فرح ومرح بجوك الهادي
من ديواني الرابع مكمل المشوار.
سليمان ابو لطفي وسوف
تعليقات
إرسال تعليق