مين اللي قال ..شعر محكي للشاعر السوري ناصر صالح
قصيدة بعنوان
( مين اللي قال )
مين اللي قال بغيبتك تعبان
ومن كثر قهري بخانق خيالي
وبرجع عا بيتي من القهر سكران
وبحكي متل مجنون مع حالي
ومين اللي قلك بالحزن غرقان
ودمعات عيني دوم سيالي
ومين اللي قلك هالدني كرهان
وقلك عا بعدك ساءت احوالي
ومين اللي قلك ضايع وتيهان
وبمشي يميني بفكرو شمالي
وبغلط عا بيتي بفوت عالجيران
وكل شي مخربط صاير قبالي
هيدا اللي قلك بالغلط فهمان
وعني غلط وصللك رسالي
عايش حياتي بعدك وفرحان
وما جيت مرة إنت عا بالي
عندي صرت متلك متل إنسان
خان الهوى وباع برخص غالي
متلك متل إنسان حبي خان
وبهمل أنا اللي اختار إهمالي
بعدي أنا وحدك إنت خسران
مو كل ناسك هن أمثالي
الوردة جمالا وهي عالأغصان
وبعد القطف بتصير بالزبالي
-----------------------
ناصر صالح
تعليقات
إرسال تعليق