خلصت الفرقة .. محكي للشاعر السوري ناصر صالح
( قصيدة بعنوان)
( خلصت الفرقة)
لما صديقك بيخذلك وانت كنت واقف معو عالمرة قبل الحلوة ولما احتجتو تركك ودار ضهرو ومشي واتخلا عنك :
وبعتذر عن طول القصيدة
جيتك صديقي و القلب مقهور
و ظنيت عندك ها الدوا إلقا
وظنيت لما ها الزمان يجور
بلاقيك جنبي بحكم ها الرفقة
و ظنيت لما الدهر فيي يدور
بلاقي صديق بضيقتي بيبقى
وظنيت عندي بعتم ليلي نور
و ظنيت ضهري عا جبل بلقا
وظنيت حالي مستند عا صخور
و عندي سند من ها الدني أنقا
و شو خاب ظني وخاب كل شعور
ال بحصة ال بقلبي قررت بقا
اتذكر لا تنسى سنين معها شهور
أوقف معك لو تشهق الشهقة
و شو وقفت حدك بس كنت ميسور
عطيتك حناني عطيتك الرقة
اتذكر صديق ال بايعو بقشور
لاجلك حرق حالو متل ورقة
و لما احتجتك بان ها المستور
و ما عدت لعندي مرقت مرقة
يا شوك بري كنت شوفو زهور
يا أرض صحرا و ما بها رزقة
مو جاي حتى عاتبك بسطور
و لا جاي منك أطلب الصدقة
نفسي عزيزة و ما بعيني قصور
و ما هو أنا اللي بطلب الشفقة
خلي العتب جوا القلب محصور
بكرى العتب بنساه عا الفرقة
ما ردت أبعد بس صرت مجبور
سقيتك عسل وسقيتني الحرقة
لا تظن إنو جانحي مكسور
لساتني متل الجبل بلقا
و لساتني ب حلق متل النسور
و لساتني بشمخ متل عنقا
ان كان لك عليي بيوصلك عالفور
روحي ما نكرت للبشر حقا
ان كان لي عليك ومن قلب مفطور
روحي الأصيلة مسامحة بحقا
إبن الأصل ما اعتاد إنو يجور
إبن الأصل بيبان با الزنقة
ما لك عذر تا قول انت معذور
منك تركت الروح مختنقة
ذنبك معي ما هو ذنب مغفور
و حالف بوابك ما بقا دقا
مانك كفو يا أرض جردا و بور
إنك صديقي بها العمر تبقى
جميلي معك يا للأسف منكور
صفحة رفقتك قررت شقا
اتخليت عني بس صرت معسور
و عا ها الصداقة أطلقت طلقة
لما الدني بكرى عليك تدور
تا نشوف جنبك مين رح تلقا
ما بسامحك لو يرجع المقبور
و عا الأرض تطبق ها السما الزرقا
بآخر سطر يا صاحبي مشكور
و فرصة سعيدة خلصت الرفقة
--------------------------
ناصر صالح
تعليقات
إرسال تعليق